Харьковдогу атышуу: үч адам каза таап, 15и жарадар болду
Бул тууралуу Харьков облусунун аскердик администрациясынын башчысы Олег Синегубов жана Харьковдун мэр Игорь Терехов билдирди. Терехов жазгандай Харьков 15 соккуга кабылган. Салтов району учкучсуз учак менен аткыланды, жергиликтүү бийлик сокку жеке үйгө тийгенин айтты.
Европа Биримдигине мүчө мамлекеттердин башчылары АКШнын Украинадагы согушту токтотуу аракетин колдой турганын, бирок Вашингтон сунуштаган план кайра иштелип чыгууга тийиш экенин жарыялады. Алар 22-ноябрда Түштүк Африкадагы G20 саммитинде Кошмо Штаттардын тынчтык планын талкуулап, биргелешкен билдирүү таратты.
"Пландын азыркы долбоору 28 пункттан туруп, адилеттүү жана узак мөөнөттө тынчтыкка жетишүү үчүн зарыл элементтерди камтыйт. Ошондуктан, биз бул долбоор тынчтыкка негиз, бирок кайра иштеп чыгууну талап кылат деп эсептейбиз. Болочокто дүйнөнүн туруктуулугун камсыздоо үчүн биз бул процесске кошулууга даярбыз. Биз чек аралар күч менен өзгөртүлбөшү керек деген так көз караштабыз. Бизди Украинанын Куралдуу күчтөрүн чектөө сунушу да тынчсыздандырат, ал Украинаны болочоктогу чабуулдар үчүн алсыз кылып коюшу мүмкүн", – деп жазылган Еврокомиссиянын сайтында жарыяланган документте.
Анда ЕБ жана НАТОго тиешелүү пункттар бул бирикмелердин макулдугу менен гана ишке ашырылышы мүмкүн экени белгиленген. Евробиримдик Украинаны мурдагыдай эле колдой турганын кайталады.
Bild басылмасынын маалыматына караганда, Батыштын лидерлери АКШ президенти Дональд Трамптын тынчтык планындагы кеминде төрт жобону өзгөртүүнү көздөйт. Алар негизинен Трамптын Орусиянын Крым, Донбасс жана башка аймактарга суверендүүлүгүн таануу, украин армиясынын санын азайтуу, коопсуздук кепилдиктеринин шарттары, камакка алынган орусиялык активдер тууралуу сунуштарына макул эмес.
Bild америкалык президенттин камактагы активдер тууралуу демилгеси өзгөчө Германиянын канцлери Фридрих Мерцтин "кыжырын кайнатканын" жазды.
Америка бийлигинин планы 23-ноябрда Женевада ЕБ, АКШ жана Украинанын делегацияларынын жолугушуусунда талкуулана турганы кабарланды. Жолугушууга кимдер катышары азырынча белгисиз.
Швейцарияда жолугушуу болору ыктымалдыгы тууралуу буга чейин Украинанын Улуттук коопсуздук жана коргоо кеңешинин катчысы Рустем Умеров айткан, бирок анын датасын тактаган эмес.
The Guardian басылмасынын маалыматында, Трамп Дрисколлду Украина боюнча жаңы өкүлү кылып дайындады. Басылма ал учурдагы атайын өкүл Кит Келлогдун ордуна барабы же экөө тең катар иштейби тактаган эмес. Буга чейин Келлог 2026-жылдын январында кызматтан кетүүнү пландап жатканы белгилүү болгон.
Дрисколлдун Украина боюнча атайын өкүл болуп дайындалышы расмий жарыяланган жок.
Дэниел Дрисколл вице-президент Жей Ди Вэнстин классташы жана жакын досу. АКШнын Армия министрлигин үстүбүздөгү жылдын февралынан бери жетектеп келет. Аскердик тажрыйбасы бар, мамлекеттик кызматка чейин инвестициялык компанияда иштеген.
20-ноябрда Дрисколл башында турган делегация Киевге АКШнын тынчтык планын сунуштаган. Жолугушуудан кийин украин президенти Владимир Зеленский бул келишимдин үстүнөн иштөөгө даяр экенин билдирген.
Financial Times 21-ноябрда АКШ делегациясы Киевде европалык чиновниктер менен жолугушкан. Басылманын булактарынын айтымында, сүйлөшүү чыңалган абалда өткөн. Дрисколл "тынчтык орнотуу мезгили келгенин" айткан. Ошол эле учурда АКШ эч кандай ийкемдүүлүк көрсөтүүгө даяр эмес экенин баса белгилеген.
Басылма айрым европалык дипломаттар Вашингтон Зеленскийдин айланасындагы коррупциялык жаңжал күчөп, позициясы алсырап турган кезде келишимге кол коюуну тездетүүгө аракеттенүүдө деп эсептешет. Бул маалыматтар расмий ырасталган эмес.
Батыш медиаларынын маалыматында АКШнын планынан кийин Киевдин өнөктөштөрү альтернативдүү демилгенин үстүнөн иштей баштады. Европа сүйлөшүүнү азыркы фронттун сызыгында жүргүзүүнү сунуштаса, АКШ өз планында Украина айрым аймактардан баш тартууга барышы керектигин караштырган. Бул талапты Москва да коюп келет. Зеленский Украина өз аймактарын жөн эле кармата берүүгө даяр эместигин бир канча жолу кайталаган.
Америка Кошмо Штаттарынын президенти Дональд Трамп Fox News телеканалынын журналисти Брайан Килмидге интервью берип жатып Орусияга каршы "өтө оор" санкцияларды киргизүүгө даяр экенин билдирди.
Журналист АКШ президенти Украинада тынчтык орнотуу боюнча 28 пункттан турган план талкууланып жаткан маалда АКШ Орусияга мындан мурда салган санкцияларын алып салууну көздөгөн жокпу деген суроо салды. Трамп керек болсо жаңы, мындан да күчтүү санкцияларды салууга даяр экенин, ал тизме жакын арада даяр болорун айтты.
Америкалык лидердин айтымында, 27-ноябрь Киевге сунушталган шарттарды кабыл алууга берилген соңку мөөнөт болот.
Мындан тышкары, Трамп украин аскерлери аймактарды алдырып жатканын белгилеп, Москва Балтика өлкөлөрүнө кол салбасына ишенип турганын айтты. "Чочулоого негиз жок, анткени Украинадагы уруш чечилет",-деди Трамп.
Ал тапта The Wall Street Journal Америка сунуштап жаткан келишим Орусияга каршы санкцияларды алууну жана бул өлкөнү кайрадан "Чоң жетиге" кошууну көздөрүн жазууда. Планда Украинада кеминде он жыл тынчтык болору жазылганы менен ал АКШны түзмө-түз аскерий жардам берүүгө милдеттендирбейт.
Документте мындан тышкары АКШ-Орусиянын энергетика, жасалма интеллект жана Арктикада кен байлыктарды казуу боюнча кызматташтык каралган.
Ал эми The Washington Post АКШ Киевдин айрым сунуш-пикирлерин эске алууга даярдыгын жазды. Басылманын билдиришинче, укарин лидери Владимир Зеленский менен АКШ армиясынын министри Дэниел Дрисколлдун жолугушуусунан кийин Украина тарап айрым алымча-кошумчаларды сунуштап, буга Дрисколлдун командасы каршылык көрсөткөн жок.
Зеленский вице-президент Жей Ди Вэнс менен сүйлөшкөнү тууралуу да айтты.
"Американын Украинада тынчтык орнотуу, согушту тезирээк бүтүрүү боюнча сунуштаган келишимин талкуулап, кийин эффективдүү иштеп кетүүсү үчүн көп деталдарды сүйлөшүүгө жетиштик. Ошондой эле Америка жана Европа менен кеңешүү аркылуу тынчтыкка жетүү жолун чынында эле жакшы иштеп кеткидей кылууну макулдаштык", - деди украин президенти.